အိပ်မပျော်တဲ့ ညများ ကုန်လွန်ပါစေ
ညဘက် အိပ်မရ၊ အိပ်လို့မပျော်တဲ့ ခံစားချက်ကို ကိုယ်တိုင်ခံစားဖူးသူတွေပဲ ကောင်းကောင်းနားလည်ကြမှာပါ။ ရည်ရွယ်ချက်ရှိရှိနဲ့ တမင်မအိပ်တာမျိုးမဟုတ်ဘဲ Insomnia လို ရောဂါအခြေအနေကြောင့်၊ တခြားကျန်းမာရေးပြဿနာတွေကြောင့်၊ စိတ်ဖိစီးမှုတွေကြောင့် ညဘက်တွေမှာ နေ့စဉ်ရက်ဆက် အိပ်ပျော်ဖို့ ခက်နေတဲ့အခါ ကြာလာရင် ကျန်းမာရေးက သေချာပေါက် ထိခိုက်လာတော့မှာပါ။
သင့်မှာ Insomnia လို အိပ်မပျော်တဲ့ ကျန်းမာရေးပြဿနာရှိလားဆိုတာကို
- အိပ်ပျော်ရန် ခက်ခဲခြင်း
- ညဘက်မှာ ခဏခဏ လန့်နိုးလာတတ်ခြင်း
- အိပ်ဖို့ကြိုးစားတိုင်း မျက်စိကြောင်နေခြင်း
- အစောကြီးနိုးလာပြီး ပြန်အိပ်မပျော်တော့တာ
- အိပ်ရာနိုးတဲ့အခါ ပင်ပန်းနုန်းချိနေသလို ခံစားရတာ
- နေ့ဘက်တွေမှာ ပင်ပန်းနေတာတောင် တစ်ရေးမှေးဖို့ ခက်နေတာ
- တစ်နေ့တာလုံး ပင်ပန်းပြီး စိတ်အလိုမကျဖြစ်ခြင်း
- အာရုံစူးစိုက်ဖို့ ခက်ခဲခြင်း စတဲ့ လက္ခဏာတွေကို အနည်းဆုံး နှစ်ပတ်ကနေ တစ်လလောက် ခံစားနေရပြီဆိုရင်တော့ ဒီရောဂါရှိနေနိုင်တယ်လို့ အကြမ်းဖျဉ်းသတ်မှတ်လို့ရပါတယ်။
ဘာအကြောင်းကြောင့်ပဲဖြစ်ဖြစ် ညဘက်အိပ်ပျော်နိုင်ဖို့ ခဲယဉ်းနေတဲ့ ပြဿနာကို ဖြေရှင်းဖို့အတွက် အခုပြောပြမယ့် နည်းလမ်းတွေကို လုပ်ကြည့်ဖို့ အကြံပေးချင်ပါတယ်။
၁။ နေ့တိုင်း တူညီတဲ့ အချိန်ဇယားနဲ့ ညအိပ်ပြီး မနက်နိုးထဖို့ အလေ့အကျင့်လုပ်ပေးပါ။
၂။ ကိုယ့်ရဲ့ အိပ်ခန်းကို မှောင်ပြီး အသံလုံနေဖို့ သေချာပြင်ဆင်ပါ။
၃။ မိသားစုဝင်တွေကို ကိုယ်အိပ်နေတဲ့အချိန် မဆူညံဖို့ သေချာသတိပေးပါ။
၄။ အိပ်တော့မယ်ဆိုရင် သာယာတဲ့ တေးသံသာတွေကို ဖွင့်ထားပါ။
၅။ စိတ်ဖိစီးမှုတွေ၊ ပြဿနာပေါင်းစုံကို အိပ်ခန်းအပြင်မှာ ချန်ထားခဲ့ပါ။
၆။ မနက်အစော ဒါမှမဟုတ် ညနေခင်းမှာ လေ့ကျင့်ခန်းသေချာ လုပ်ပေးပါ။
၇။ ညမအိပ်ခင် တစ်နာရီလောက်အလိုမှာ ယောဂလို အကြောလျှော့လေ့ကျင့်ခန်းမျိုး လုပ်ပေးပါ။
၈။ ညမအိပ်ခင် ရေနွေးနဲ့ ရေချိုး၊ ရေစိမ်ပေးနိုင်ရင်လည်း ပိုကောင်းပါတယ်။ ရေအေးနဲ့ ချိုးတာကိုတော့ ရှောင်ပါ။
၉။ ကိုယ့်ရဲ့ ကုတင်၊ ခေါင်းအုံး၊ ဖက်လုံးနဲ့ အစွပ်တွေ၊ စောင်တွေအားလုံးက ကိုယ့်အတွက် သက်သောင့်သက်သာ ဖြစ်နေပါစေ။
၁၀။ အစာအာဟာရကို သေချာဂရုစိုက်ပါ။
၁၁။ ညမအိပ်ခင် အနည်းဆုံး ၂ နာရီလောက်ခြားပြီး တီဗီရုပ်ရှင်ကြည့်တာ၊ ဖုန်းသုံးတာ၊ အလုပ်လုပ်တာ၊ ဂိမ်းဆော့တာကို နောက်ဆုံးထားလုပ်ပေးပါ။
၁၂။ နေ့လယ်နေ့ခင်း တစ်ရေးအိပ်တဲ့အကျင့်ကို ရှောင်ပါ။
၁၃။ ကဖင်းဓာတ်စားသုံးမှုကို လျှော့ချပါ။
၁၄။ အိပ်ချိန်နဲ့ အနည်းဆုံး ၄ နာရီခြားပြီး အစာစားပါ။ ညမအိပ်ခင် အစာစားတတ်တဲ့ အကျင့်ကို ဖျောက်ပါ။
ဒီနည်းလမ်းတွေဟာ ပုံမှန်လူတွေရော ညအိပ်မပျော်တတ်သူတွေပါ နေ့စဉ် လုပ်ပေးသင့်တဲ့ အမူအကျင့်တွေပဲ ဖြစ်ပါတယ်။ အိပ်မပျော်တဲ့ ပြဿနာရှိသူတွေအတွက် ဒီအကျင့်တွေဟာ အစပိုင်းမှာ ခက်ခဲနိုင်ပေမယ့် ဖြည်းဖြည်းချင်း ကျင့်သားရသွားတဲ့အခါ အိပ်ဖို့ အဆင်ပြေသွားမှာပါ။
ဒီလိုမှမဟုတ်ဘဲ လုံးဝအိပ်လို့မပျော်ဘူးဆိုရင်တော့ ဆရာဝန်နဲ့ သေချာပြပြီး တခြားကျန်းမာရေးပြဿနာတွေကြောင့် အိပ်မပျော်ဖြစ်တာလားဆိုတာကို ကျန်းမာရေးစစ်ဆေးမှု ပြုလုပ်သင့်ပါတယ်။ တခြားနည်းလမ်းတွေအနေနဲ့
- အိပ်ဆေးသောက်အိပ်ခြင်း (ရေရှည်အတွက် လုံးဝအဆင်မပြေပါ)
- အမွှေးရနံ့ကုထုံးဖြင့် ကုသခြင်း
- CBT ဦးနှောက်ပိုင်းဆိုင်ရာ ကုထုံးဖြင့် ကုသခြင်း
- အိပ်ချိန်အား အကန့်အသတ်ထားခြင်း
- တခြားရောဂါသောက်ဆေးတွေကို ချင့်ချိန်ပြောင်းလဲပေးခြင်း
အိပ်ရေးပျက်တာဟာ တစ်ရက်တလေပဲဆိုရင်တောင် ကိုယ့်ရဲ့ကျန်းမာရေးကို ထိခိုက်စေတဲ့အတွက် ညစဉ်ညတိုင်း ကောင်းကောင်းအိပ်မပျော်နိုင်ဘူးဆိုရင် ကြာလာတာနဲ့အမျှ ကျန်းမာရေးပြဿနာတွေ ဖြစ်လာပြီး အသက်တိုစေနိုင်တာကို သတိပြုပေးပါ။
ရဲမျိုးမြတ်